خمس ايام 3 حكايات روماني مكرم
كنت حاسة إن روحي بتتسحب، وصوت شريف جاي من بعيد عبر المايك وهو بيصرخ في المساعدين بتوعه:
> «الضغط بيقع! النبض هيقف! زودوا الأكسجين… إلهام قاومي! كمان 30 ثانية والمركب يتكسر!»
>
في اللحظة دي، وسط الضباب والألم المرعب، شفت شاشة المراقبة اللي برة الكبسولة… تليفون شريف الخاص كان بيرن، والاسم اللي مكتوب عليه كان مفاجأة شلت القدرة اللي باقية في عقلي على التفكير.
المتصل كان: **أستاذ عاصم المحامي!**
شريف فتح الخط بسرعة وسبيكر عشان أسمع، وصوت عاصم جه ملهوف ومبحوح وهو بيصرخ وسط صوت سرينات الشرطة:
> «شريف!! وقف العملية حالا!! وقف كل حاجة! المندوب اللي جه الشهر العقاري مش تبع رفعت… رفعت الهواري مات فعلاً من عشر سنين في حادثة السويس والشركة دي واجهة لشخص تاني خالص… الشخص ده معاكم في المستشفى دلوقتي ومطلع على كل تفاصيل التحاليل من الأول!!»
>
أنفاسي انقطعت تماماً، وعيني جَت في عين شريف اللي واقف ورا الزجاج… شريف ساب لوحة التحكم، وابتسامة غريبة، باردة، ومرعبة بدأت تترسم على وشه وهو بيبصلي، ومد إيده ببطء… وفصل جهاز الأكسجين عن الكبسولة!
حكايات رومانى مكرم تابعو صفحه رومانى مكرم
## الجزء السابع
الهوا اتسحب من الكبسولة في ثانية. صدرى هبط والبلور الزجاجي قدام وشي بدأ يتغطى ببخار أنفاسي الأخيرة والمكتومة.
شريف كان واقف ورا الزجاج، لابس نفس الوش البارد اللي شفت بدير لابسه من كام يوم. نظرة الصداقة والدعم اللي عشت عمرها كله مصدقاها اتبخرت، وحل مكانها جشع أعمى ملوش قاع. مَد إيده وضغط على زرار قفل لوحة التحكم تماماً عشان عاصم ما يعرفش يوقف الأجهزة من برة، وبصلي وقال بصوت واطي واصل عبر سماعة الطوارئ الداخلية:
> «آسف يا إلهام… بس إنتِ اللي صممتي تكبري وتدخلي في حتة مش بتاعتك. رفعت الهواري مات فعلاً، وأنا اللي اشتريت منه اسم شركته القديمة بالورق والمستندات من عشر سنين عشان أعمل الواجهة دي. أنا اللي صنعت “ألفا هولدنج” بالفلوس اللي كنتِ فاكرة إني بساعدك تديريها.»
>
حاولت أرفع إيدي وأخبط على الزجاج، بس الغليان اللي في عروقي شل حركتي. شريف كمل وهو بيبص لساعة إيده ببرود:
> «بدير كان مجرد حجر شطرنج غبي، لما لقاكي بتكبري في السن ومفيش وريث، طمع وعرض عليا الشراكة من وراكي عشان نخلص منك ويورثك هو قانوناً ونقسم الإمبراطورية. بس هو اتسرع وغباءه كشفه. المكالمة اللي جاتلك بالليل؟ أنا اللي مغير صوتي ببرنامج، والراجل اللي شفتيه تحت في الشارع ده ممثل كومبارس أنا مأجره ولابس ماسك سيليكون لوش رفعت عشان أجننك وأخليكي تجري عليا برجليكي… وتدخلي الكبسولة دي بكامل إرادتك.»