ابني اتصل بيا حكايات زهره 2
وقع حازم على ركبتيه قدام الباب المقفول، الكلمات بتاعة عم حسن نزلت على ودنه زي المطرقة. “أنا دبحتهالك كلها ودلقتها في الحوض.. مخلتش منها فتفوتة”. افتكر على طول الأكلة اللي كانت مدمساها ليه، وافتكر نبرة صوته وهو بيقول لها في التليفون: “بلاش تيجي يوم الجمعة”. كان فاكر إنها مجرد مكالمة عابرة هيرضي بيها مراته، ومكنش يتخيل إنها كانت رصاصة الرحمة اللي ضــ,,ـــــربها على علاقتة بأمه.
عم حسن بص له بنظرة أخيرة، ورزع الباب وسابه بطوله في الضلمة. حازم مسك تليفونه بإيد بترتعش، وحاول يتصل بنهى، لعل وعسى تسانده في المحنة دي، لكن لقى خطها بيديه “رقم غير متاح”، واضح إنها عملت له حظر بمجرد ما وصلت بيت أهلها.
نزل حازم السلم وهو بيجر رجليه، الدنيا اسودت في عينه. ركب عربيته اللي بنزينها كان خلاص بيشطب، ومبقاش عارف يروح فين. رجع على حدائق الأهرام، الشقة الفاضية الضلمة. دخل وبص على الركنة الفخمة والستائر الستان اللي نهى اختارتها بالشيء الفلاني، وحس إن كل حيطة في الشقة دي بتضحك عليه بشماتة.
عدى الليل عليه كأنه سنة، مكنش قادر يغمض عينه. وفي تمام الساعة التاسعة صباحاً، تليفونه رن بصوت عالي. خطف التليفون بسرعة وهو بيتمنى يكون اسم “أمي”، لكن الشاشة كانت بتعرض رقم غريب.
رد بصوت مبحوح: “ألو؟”
جاءه صوت رجل حاد ورسمي: “استاذ حازم عبد الحميد؟ معارك أسامة النجار، من شركة ‘القمة للاستثمار العقاري’. إحنا اشترينا النص الشائع في شقة حدائق الأهرام من والدتك السيدة عايدة، ومعانا تنازل رسمي وموثق في الشهر العقاري.”
حازم وقف على حيله وبدأ يزعق بهيستيرية: “بيع إيه وتنازل إيه؟ الشقة دي شقتي وأنا اللي ساكن فيها!”
الرجل رد ببرود قاتل: “يا فندم القانون واضح، إحنا شركاء معاك على الشيوع، وبما إنك متعثر في سداد الأقساط للبنك والشركة هي اللي هتدفع الباقي عشان تحمي الاستثمار بتاعها، فإحنا بعتنا لك خبير هيوصل عندك كمان ساعة عشان يعاين الشقة ويقيم تمنها، عشان نرفع دعوى فرز وتجنيب ونبيع الشقة بالكامل في المزاد العلني، إلا لو عندك كاش تشتري حصتنا وحصة البنك.”
حازم قفل السكة وهو حاسس إن روحه بتتسحب. “كاش؟” هو مبقاش حيلته تمن لتر بنزين واحد!
بعد ساعة بالتمام، جرس الباب رن. فتح حازم وهو متبهدل وعينه منفوخة من قلة النوم. لقى قدامه راجل أربعيني لابس بدلة أنيقة، ومعاه اتنين رجالة جثتهم عريضة.
الراجل دخل من غير ما يستأذن وبدأ يتجول في الشقة ويسجل ملاحظات في دفتر معاه: “التشطيب سوبر لوكس.. المساحة 180 متر.. العمارة موقعها مميز.. تمام”.