اختفي جوزي حكايات روماني مكرم 1
في لحظة، النار اللي كانت في قلبي اتحولت لبركان. رميت الفازة بكل قوتي، بس مجتش فيهم، اتكسرت ميت حتة على الأرض زي قلبي. جريت على عصام وأنا بصرخ: “دي فلوسي! ده شقايا! والله ما هسيبكم!”
عصام مسك إيدي بقوة وزقني لورا لحد ما وقعت على السيراميك، وبص لسوزي وقال: “اطلبي الأمن يا سوزي، خلينا ننضف البيت ده من الكراكيب القديمة.”
طلعت من البيت وأنا مكسورة، واقفة في الشارع بشنطتين هدوم والناس بتبص عليا بشفقة. بس وأنا ماشية، حطيت إيدي في جيب الجاكت ولقيت حاجة عصام نسيها في الزحمة.. ”
” .. لقيت فلاشة ميموري صغيرة سودا.
الفلاشة دي مكنتش مجرد حتة حديدة، دي كانت “صندوق أسرار عصام”. هو كان دايماً بيشيلها في جيب الجاكت بتاعه اللي استعجل وأداهوني في الشنطة من غير ما يفتشه. الفلاشة دي عليها الحسابات السرية للشركة، والتحويلات، والأهم من كل ده: النسخة الأصلية من عقد بيع الشقة اللي أبويا كبتهالي باسمي قبل ما يموت، وعصام قنعني زمان إنه ضاع!
في اللحظة دي، الدموع اللي في عيني نشفت. البرد اللي كان بيموتني في الشارع اتقلب لحرارة قايدة في عروقي. طالما العقد الأصلي معايا، وطالما الحسابات دي في إيدي، يبقى الحرب لسه مبدأتش يا عصام.. وإنت اللي فتحت على نفسك أبواب جهنم.
أخدت الشنط ورحت على بيت خالتي، الوحيدة اللي باقية لي بعد موت أبويا. أول ما شافتني بالمنظر ده صوّتت، بس أنا وقفتها بإيدي وقلت لها بصوت قاطع: “مفيش وقت للعياط يا خالتي، أنا عايزة رقم الأستاذ كمال المحامي، صاحبي أبويا الله يرحمه.. المحامي الثعلب اللي مبيخسرش قض..ية.”
تاني يوم الصبح، كنت قاعدة في مكتب الأستاذ كمال. حطيت الفلاشة قدامه وحكيت له كل حاجة من طقطق للسلام عليكم. الراجل حط الفلاشة في الكمبيوتر، وفضل يبص للشاشة وعيونه بتوسع، لحد ما ابتسم ابتسامة خبيثة وبص لي وقال:
* “بصي يا بنتي.. جوزك والسكرتيرة بتاعته غباءهم عماهم. الفلوس الـ 4 مليون جنيه اللي اتقفلت في حساب شركتهم الجديدة، اتحولت بناءً على “توكيل عام” إنتي كنتي لغياه من سنة، وهو استخدم صورة قديمة منه ومضى بدالك بالتزوير. والشركة الجديدة لسه ورقها مكملش في السجل التجاري.. يعني الفلوس لسه معلقة!”
قلبي دق بسرعة وقلت له: “يعني إيه يا متر؟ هعرف أرجع شقايا؟”
الأستاذ كمال ساند ضهره لورا وقال: “هنرجع الشقى، والذهب، والشقة.. بس مش بالقانون الحافي. إحنا هنعملهم كمين يخليهم يلفوا حوالين نفسهم. أول خطوة، هرفع قض..ية مستعجلة بإبطال تزوير وتجميد حساب الشركة الجديدة فوراً، والخطوة التانية.. الشقة دي هترجع لك بقوة القانون في خلال 48 ساعة لأن عقد البيع اللي معاكي يثبت ملكيتك ليها قبل الجواز.”