تحليل DNA حكايات رومانى مكرم٣
وكيل النيابة قرب منها: “الراجل اللي استلم الولد بالعربية السودا.. تعرفي عنه إيه؟ أو شوفتي نمرة العربية؟”
الممرضة هزت راسها بنعم وهي بتبكي: “أنا لقطت أول تلات أرقام من النمرة.. (ط ر أ 7..) والراجل اللي استلم كان لابس بدلة شيك جداً، وسمعته وهو بيتكلم في التليفون وبيقول: (يا باشا الأمانة معايا، والبيبي نايم وزي الفل.. احنا على طريق مصر الإسماعيلية الصحراوي حالا).”
طريق مصر الإسماعيلية! الكلمة دي وقعت عليا زي الصاعقة، بس في نفس الوقت فتحت طاقة أمل. ابني عايش، ممتش زي ما الشيطون ده قال! ابني اتباع لناس أغنية وأصحاب نفوذ.
وكيل النيابة لف للكمبيوتر وبدأ يكتب بسرعة، ووجه كلامه لضابط المباحث: “يا فندم، اطلب تتبع فوري للرقم ده.. واعملوا كمائن على طريق الإسماعيلية الصحراوي، واكشفوا عن صاحب العربية اللي أول نمرها (ط ر أ 7).”
أمر وكيل النيابة بحبس **أحمد** وأمه والممرضة 4 أيام على ذمة التحقيق، مع مراعاة التهم الجديدة: الاتجار بالبشر، والتزوير، واختطاف أطفال.
وأنا خارجة من باب النيابة، الشمس كانت طلعت تماماً، بس الدنيا جوايا كانت لسه ليل. في إيد شايلة بنتي الحبيبة اللي رجعتلي، وفي الإيد التانية ناري قايدة على ابني اللي مش عارفة هو في أي مكان دلوقتي، ولا مع مين، ولا بيعملوا فيه إيه.
قعدت على رصيف المحكمة، وضميت بنتي لصدري وبقيت أشم ريحتها وأبكي.. “يارب.. رجعتلي بنتي، احميلي ابني ورجعه لحضني.”
وفجأة، تليفوني اللي في الشنطة رن برقم غريب مكنتش أعرفه.
فتحت الخط وإيدي بترتعش، وجالي صوت راجل غريب، نبرته هادية، مرعبة، وثقيلة جداً.. قال جملة واحدة خلاني أقف مكاني وجسمي كله يتجمد:
“مدام **منى**.. مبروك البنت اللي رجعتلك. بس لو عايزة تشوفي ابنك التاني وهو بيتنفس.. اطلبي من النيابة تقفل المحضر فوراً وتنازلي عن الق..ضية ضد **أحمد** وأمه.. وإلا، ابنك مش هتشوفيه تاني.. لا حي.. ولا ميت.”
#الكاتب_رومانى_مكرم
حكايات رومانى مكرم تابعو صفحه رومانى مكرم تابعو
الرعب شل حركتي تماماً، والصوت الغريب اللي جالي في التليفون كان زي فحيح الأفعى في ودني. النفس اتقطع مني وأنا بمسك الموبايل بإيد بتترعش وبصيت لبنتي اللي نايمة في حضني ببراءة، ومش مستوعبة الكابوس اللي أمها عايشة فيه.
“أنت مين؟ وابني فين يا مجرم؟!” صرخت في التليفون بوجع وقهر، بس الخط قطع فجأة.
رجعت اتصلت بالرقم تاني وتالت، بس التليفون كان اتقفل وبقى غير متاح. جريت بسرعة وأنا بنهج ورجعت على مكتب وكيل النيابة، ودخلت من غير ما أخبط والعساكر حاولوا يمنعوني بس صريخي ودموعي خلوهم يتراجعوا.