حكايات زهره الربيع 2

بصيت لأحمد ولأم خطيبته والغل أكل قلبي. لفيت وشي لأم العروسة وقولتلها بابتسامة صفرا هزت كبرياءهم: “تعديل إيه يا حجة اللي بتتكلمي عنه؟ الشقة دي مش بتاعة أحمد، الشقة دي شقتي أنا ومراتي، وأحمد داخل يتفرج زيكم بالظبط.. اتفضلوا ورونا عرض كتافكم برة!”

أم العروسة وشها جاب ألوان، وبصت لأحمد بغيظ وقالت: “بقى كده يا أحمد؟ جايبنا تتمنظر علينا بشقة أخوك وتقول شقتي؟!” أحمد وشه احمر وزعق فيا: “جرى إيه يا محمود! أنت هتصغرني قدام نسايبي؟ مش أمي كلمتك وخلصت معاك وكل حاجة تمام؟!”

قربت منه وعيني بتطلع شرار، وقولت بصوت واطي ومخيف: “أمي تحلف على ما تملك يا أحمد.. تحلف على أوضتها، على دهبها، لكن شقايا وشقى مراتي اللي طفحت المر محدش ليه كلمة عليه.. اطلعوا برة!”

الست أخدت بنتها وخرجت وهي بتبرطم وتدعي، وأحمد لف عليا وهو بيصرخ: “والله ما هعديهالك يا محمود، أنت بتكسر فرحتي وبتبوظ جوازتي عشان حتة شقة؟ أنا هروح لأمي!”

سابني وجري، وأنا قفلت باب الشقة بالمفتاح والترباس، وحطيت المفاتيح في جيبي ونزلت وراه.. كنت عارف الإعصار اللي مستنيني في بيت العيلة.

أول ما دخلت البيت، لقيت أمي واقفة في الصالة وبتلطم على صدرها، وأحمد قاعد جمبها عمال يسخنها ويقول: “طردني وطرد خطيبتي يا أمي، كسرني قدام الناس وصغرنا كلنا!”

أمي أول ما شافتني، صرخت في وشي: “يا خسارة تربيتي فيك يا محمود! بتطرد أخوك الصغير وتكسر بحلفاني؟ أنت مبقتش ابني ولا أعرفك ليوم الدين لو الشقة دي مأخدهاش أخوك ورجعتلي كرامتي قدام الناس اللي صغرتني قدامهم!”

الكلام كان زي السكاكين في قلبي، بس افتكرت ناهد وهي خارجة في نص الليل وعيالها في إيدها ودموعها مغرقة وشها. قولت لأمي بثبات: “يا أمي، رضاكي على عيني ورأسي، وأنا مستعد أبوس رجلك ليل نهار.. لكن تظلميني وتظلمي مراتي الغلبانة لأ.. الفيزا أنا سددت تمنها، والفلوس فلوسي، وأحمد لو راجل يشقى ويعمل لنفسه.”

أحمد وقف وزعق: “أنا راجل وغصب عنك! ولو على الشقة أنا مش عاوزها، بس قسماً بالله ما هسيبك ترتاح ولا هسيب الست بتاعتك تدوس على كرامة أمي!”

أمي بصتلي بنظرة جحود وقالت: “اطلع برة بيتي يا محمود.. مش عاوزة أشوف وشك هنا، ولا أنت ابني ولا أعرفك لحد ما تيجي وتديني المفاتيح دي برضاك.. وبنت الشوارع اللي مقوياك علينا دي مش هتدخل البيت ده تاني!”

خرجت من البيت وأنا حاسس إن الدنيا كلها لفت بيا. خسرت أمي، وأخويا بقى عدوي، ومراتي على وش طلاق. ركبت أول ميكروباص ورحت على بيت حمايا.