اخت جوزي حكايات روماني مكرم ٢
تسمرت في مكاني، ونظرات خالد أخو جوزي كانت بتخترقني زي السهام، وصوت مصطفى في التليفون لسه بيجر شكل الخراب في الصالة. دخلة نادية بالجردل والمساحة في إيدها كانت هي القشة اللي هتقسم ضهري. بصت لنا بدهشة وقالت وهي بتمسح جبهتها بشاشتها البيضا: “في إيه يا صباح؟ مالك وشك أصفر وزي الليمونة المصرورة كده؟ وخالد واقف كده ليه وزعابيبه في السماء؟ ومين اللي صوته في التليفون ده.. مش ده مصطفى أخويا؟”
خالد لسه هيفتح بقه ويتكلم، ويبخ السم اللي في بطنه ويقول لها على التليفون وعلى الكذبة اللي أنا كذبتها، لقيت نفسي من الرعب بجري عليه وبشد التليفون من إيده وبقفل الخط في وش مصطفى خالص. خالد برّق لي وعروق رقبتها اتنفخت وقال بصوت مكتوم وعالي في نفس الوقت: “بتقفلي السكة في وش أخويا يا صباح؟ طب وعهد الله لأقلب البيت ده حتة حتة وأجيب التليفون، ولما نشوف حكاية السرقة دي آخرتها إيه!”
نادية حطت الجردل على الأرض وقربت مننا، ملامحها الشقيانة اتحولت لقلق حقيقي وقالت: “تليفون إيه وسرقة إيه يا خالد؟ فهموني في إيه؟ أنتوا مخبيين عني إيه؟”
عقلي في اللحظة دي كان شغال بأقصى سرعة، الخوف بيلد أفكار شيطانية بس عشان النجاة. قولت لنادية وأنا بحاول أهدي صوتي وأرعش شفايفي بالتمثيل: “مفيش يا نادية.. ده.. ده مصطفى كان باعت تليفون معاينة هدية ليكي وللعيال عشان يطمن عليكم، وأنا من خيبتي خبيته في الدولاب عشان كنت عاوزة أعملهالك مفاجأة يوم الجمعة لما تلمي العيال حواليكي، وخالد فاكر إني طمعت فيه وبكذب وبقول اتسرق!”
نادية عينها لمعت بدموع الفرحة وقالت: “يا حبيبي يا مصطفى.. باعت لي تليفون؟ كتر خيره وألف خيره.. طب وزعلانين ليه؟ المفاجأة حلوة يا صباح بس مش لدرجة الخناق دي كلها!”
خالد بص لي بنظرة كلها احتقار، هو عارف إني كذبت على مصطفى وقولت له اتسرق في السوق، ودلوقتي بغير الحكاية قدام أخته. قرب مني ووشه في وشي وقال بصوت واطي ويدب الرعب: “ماشي يا صباح.. اطلعي هاتي التليفون من جوة خديها ل أختي يد بيد حالا قدامي، وأنا هكلم مصطفى أخليه يتصل عليها فيديو دلوقتي حالا.. ونشوف بقى المفاجآت التانية اللي مستخبية هتوصل لفين!”
جسمي كله سقع. خالد مش هيهدا إلا لما يخرب بيتي، وهو قاصد يخلي مصطفى يكلم نادية عشان يسألها عن الفلوس والمصاريف وتطلع الكارثة الكبيرة. دخلت الأوضة ورجلي مش شيلاني، مديت إيدي في قاع الدولاب وطلعت العلبة الشيك اللي بتبرق. كنت حاسة إني شايلة حبل المشنقة بتاعي.