بقالي شهرين حكايات روماني مكرم ١
مرت الساعات تقيلة ومملة.. الساعة بقت 10 بالليل، والموبايل مطلعش منه صوت. كريم مكلمنيش، ولا سأل عليا، وكأن خروجي من البيت كان فرصة ليهم عشان يملوا الشقة براحتهم.. أو يدوروا في حاجتي! الفكرة دي لما جت في بالي خلّت دمي يغلي. حاجتي، لبسي، أسراري، كل حاجة مكشوفة قدام حماتي دلوقتي بمباركة جوزي.
على الساعة 11، الموبايل رن.. كان كريم.
أخدت نفس طويل ورديت ببرود: “أيوة يا كريم”.
رد بصوت طبيعي جداً وكأن مفيش أي حاجة حصلت: “أيوة يا سارة، إنتي فين؟ مش يلا عشان أعدي عليكي نرجع؟”
قولتله وعيني على صورة العروسة التانية اللي لسه في بالي: “لا، أنا هبات عند ماما النهاردة.. هي تعبانة ومحتاجاني جنبها”.
سكت ثواني، وبعدين قال بنبرة ضيق مكتومة: “وتباتي ليه؟ ما كنتي تقعدي معاها الكام ساعة دول وخلاص، وبعدين إزاي تاخدي قرار زي ده من غير ما ترجعيلي؟”
هنا مقدرتشأمسك نفسي، قولتله بصوت حاد بس واطي عشان أمي متمسكش طرف خيط: “وأنا من إمتى بياخدوا رأيي يا كريم؟ مش إنت قولت إن ماليش حاجة هناك؟ والبيت بيت أمك وهي حرة فيه؟ أنا قعدت في البيت اللي ليا حق فيه فعلاً.. بيت أهلي”.
زعق في التليفون: “سارة! لمي لسانك وماتدخليش الأمور في بعضها، أمي ملهاش دعوة، وأنا بكلمك دلوقتي عشان ترجعي بيتك، بلاش جنان”.
قولتله بكلمة واحدة قاطعة: “مش راجعة النهاردة يا كريم.. وقفل السكة لو سمحت عشان ماما نايمة”.
قفلت الخط قبل ما ينطق بحرف، وحطيت الموبايل على الشاحن وأنا كلي بنفض. نمت في السرير بس مجاليش نوم، الفجر كان بيأذن وأنا عيني مشافتش النوم، عقلي شغال في الرقم المجهول.. مين الست اللي كلمتني؟ ومين اللي بعتلي الصورة؟ هل هي ندى نفسها؟ ولا حد يقربلها وعايز يحذرني؟
تاني يوم الصبح، صحيت على صوت حركة في الصالة، قومت وبصيت من باب الأوضة، لقيت الصدمة اللي مكنتش متوقعاها..
كريم واقف في الصالة، ووشه باين عليه الغضب الشديد، وأمي واقفة قدامه مستغربة من عصبيته. أول ما شافني خارجة من الأوضة، شاورلي بإيده وقال بزعيق هز الحيطة:
” كويس إنك صحيتي يا هانم.. اجهزي حالا عشان تروحي معايا، وعايزك تفسري لأمك حالا إيه الذهب والفلوس اللي إنتي شايلاهم من ورايا في الدولاب دول؟! وأمي لقتهم بالصدفة لما دخلت تروق الشقة!”
في اللحظة دي، حسيت إن السقف بيقع عليا.. ذهب وفلوس إيه؟ أنا مش شايلة حاجة! حماتي دخلت الشقة وبتتبلى عليا عشان تخلص مني زي اللي قبلي!