صراع نفسي بقلم احمد محمود شرقاوي

صراع نفسي

انا البنت اللي بتلبس نقاب من إعدادي تقريبا وعلى طول ماسكة السبحة وضد أي حاجة غلط ممكن تحصل خاصة من صحباتي البنات، وبالأخص بقا صحوبية الولاد والكلام معاهم، اتربيت على كدا وخرجت للمجتمع لقيت نفسي كدا، وياما اتقال عني متشددة ومعقدة ومتخلفة أيام الجامعة بسبب أفعالي ومواقفي التي لا تعد ولا تحصى..

ورغم كل ده كانت ليا صاحبة عمر متحررة نوعا ما وعاشت حياتها كلها في سنين الدراسة والكلية واتصاحبت، وكنت انا وهي زي توم وجيري ليل نهار مختلفين، بس من جوايا كنت بكدب على نفسي وبقول اني عايزة أصلحها، بس انا كنت شايفاها البنت اللي عاشت حياتها ومع ذلك اتجوزت زيي بالظبط وكونت أسرتها بدون أي تعقيدات في حياتها، عشان كدا مكنتش عارفة أقطع علاقتي بيها، حاجة غريبة وغير مفهومة جوايا، معرفش ده نقص ولا نفاق ولا ايه بالظبط، بس كنت أضعف من إني أواجه نفسي بحاجة زي كدا من الأساس..

وعدت الأيام واتجوزت وصاحبتي مها هي كمان اتجوزت، وفضلت أنا على نفس الحال متشددة مع جوزي في أي حاجة خاصة بالحلال والحرام، وهو كان متقبل ده نوعا ما، وكنت كل فترة بقابل مها ونحكي، وكانت بتحكيلي عن رحلة المصيف اللي لبست فيها البكيني، ولما خرجت بشعرها في اسكندرية وحاجات من هذا القبيل، وبرضه كنت بحس انها النسخة اللي كنت بتمنى أكونها بس المجتمع فرض عليا نسخة تانية خالص..

وخدتنا الأيام تقريبا يمكن ١٨ سنة زواج، كنت ساعتها وصلت لسن الأربعين، وقتها جوزي جاله الضغط وبقا عصبي بطريقة مُبالغ فيها جدا، موضوع التفاهم والكلام بالحُسنى ده كان شبه انتهى، غير ان ابني كان في كلية حاسبات ومعلومـ,,ــات ومتغرب وده زود التوتر جوايا أكتر وأكتر..

ورغم إني كتومة على حياتي أوي ومبحبش أحكي عنها إطلاقا إلا إني في النهاية حكيت لمها صاحبتي، حكيتلها ان الفترة دي تعتبر أكبر فترة توتر في حياتي للأسف، جوزي بقا عصبي بطريقة مبالغ فيها جدا، ابني متغرب، وانا نفسي بقا بيجيلي ألم في معدتي كتير.

قالتلي إن الموضوع نفسي بحت، واني لازم أخد جلسات أسترخي فيها واهدى شوية، قولتلها جلسات اي قالتلي جلسات علاج نفسي، كدا وإلا حالتي هتتدهور أكتر واكتر، استغربت أوي من كلامها، من امتا بتتكلم بالعلم والمنطق ده، قالتلي انها راحت عيادة دكتور نفسي في فترة من الفترات واتعالجت وبقت كويسة جدا جدا، طيب العيادة دي بتاعت مين، قالتلي بتاعت دكتور اسمه مروان.

استغربت أوي انها تعرض عليا حاجة زي دي، انا هكشف نفسي على راجل غريب ولوحدنا في خلوة، قالتلي ان اللي دمرني هو التشدد اللي في حياتي ده، ده مجرد كشف بدون ما اكشف وشي زي كشف أي دكتور، ومليون المية عنده حل جذري.