عرافه المـ,ـوت بقلم احمد محمود شرقاوي

عرافة المو.ت

فيه عرافة قابلتني في حديقة الحيوان من يومين أنا وبنت عمي وفضلت باصة على بطني بطريقة غريبة، ولما قربنا منها قالتلي بالنص (للأسف هتفقدي ابنك خلال أسابيع ربنا يتولاكي) وقتها من الغضب كنت همسك فيها لولا نُهى بنت عمي، وفي النهاية حصل أغرب موقف ممكن، العرافة ادت بنت عمي كارت وقالتلها لو حبت تلحق ابنها خليها تتصل بيا، من امتا العرافات بقا معاهم كروت، استهزأت بيها ومشينا، بس بصراحة كنت خايفة أوي من جوايا، ده حملي الأول وأنا في الشهر السادس، والفترة الأخيرة بقيت بتعب تعب غريب، بس قررت اتمالك أعصابي ومفكرش في الموضوع..

وبعد أيام بدأ التعب يزيد عليا يوم بعد يوم لحد ما صحيت في يوم على نزيف شديد، وكانت ليلة مرعبة والألم فيها كان بشع، وفقدت ابني للأسف، ورجعت من المستشفى وأنا في حالة من الحزن والاكتئاب الشديد، كنت مقهورة وحزينة لأقصى درجة، وفضلت كلمات العرافة ترن في ودني (للأسف هتفقدي ابنك خلال أسابيع ربنا يتولاكي) وفضلت كلماتها لبنت عمي تطاردني لأيام طويلة (لو حبت تلحق ابنها خليها تكلمني) ولقيت نفسي بتصل ببنت عمي وبسألها على رقم العرافة، استغربت جدًا مني وقالتلي إنها ضيعت الكارت، طلبت منها تدور عليه وتلاقيه بأي طريقة، حاولت تفهمني إن ده قدر ونصيب بس مكنش عندي استعداد للنقاش، وهي فعلًا أشفقت عليا وبعتتلي الرقم في النهاية..

كلمت الست وطلبت إننا نتقابل، وفعلًا روحت حديقة الحيوان وقابلتها، والمرة دي تأملتها بزيادة، واحدة راسمة حنة ولابسة عباية ملونة ولابسة في رقبتها عُقد أحمر، سألتها بهدوء وطلبت منها تقولي ازاي عرفت إني هجهض ابني..

قالتلي إن ربنا وهبها كرامة وبتقدر تحس بالناس، قولتلها كانت هتنقذ ابني ازاي، قالتلي كانت هتدعيلي ونعمل خير ينقذني، كتمت دموعي بالعافية لأن كلامها كان منطقي جدًا، وفجأة لقتها بتترعش وبصت ناحيتي بقوة، سيطرت على نفسي بالعافية لقتها بتقولي

(محمد جوزك هيمو.ت قريب)

وغصب عني صرخت صرخة مكتومة، لقتها بتبص يمين وشمال وبتكلم حاجة مش موجودة، سألتها بلهفة وخوف هيمو.ت ازاي، قالتلي إن عندي سحر هو السبب في الاجهاض، وإن هيكون سبب لمو.ت جوزي لو قرب مني وعمل معايا علاقة جسدية، جسمي كله اترعش وسألتها عن الحل، قالتلي اقابلها خلال أسبوع تكون قدرت توصل لحل، واشترطت عليا إني جوزي ميقربش مني أبدًا خلال الأسبوع ده..

وفضلت أفكر ازاي همنع نفسي عنه، وفعلًا كان أسبوع صعب جدًا ومنعت نفسي عنه بالعافية، اتحججت بكل حاجة لحد ما غضب مني وقاطــ,,ـــــعني، وجه يوم المقابلة وقالتلي إن لازم يحصل تجديد عشان السحر ميأثرش عليه، والحل إن جوزي يتجوز عليا ولو ست شهور بس، وطول الفترة دي ميقربش مني لحد ما اتعالج، كدا وإلا مع أول علاقة بينا هيمو.ت، ورجعت وأنا هتجنن، خايفة اتجاهل الموضوع يتكرر نفس اللي حصل مع ابني، عشان كدا فضلت أفكر وأفكر، وملقتش غير حل واحد اقترحته واحدة صاحبتي قريبة مني..