الحجه ملكه بقلم احمد محمود شرقاوي

اتكلمت معاها بخوف بس طمنتني وقالت إنها بتختار اللي بتشغلهم معاها وإن مش هحتاج فلوس بعد انهاردة وهتساعدني في علاج أمي والشفاء النهائي، كانت بتتكلم بثقة غير طبيعية، واللي استغربتله إن طبيعة الشغل كانت سهلة خالص، علمتني كام كلمة وطريقة معينة اضر*ب بيها على الدُف، هو ده اللي هعمله في جلسات الزار..

الكلمات هي:

(ادّيني وريني واشفيني وخليني) واض*رب على الدف بطريقة ( ١ ٢ ١ ١ ٢ )..

وروحت معاها أول جلسة زار، وعلى عكس المتوقع الموضوع كان سهل وبسيط تمامًا، عملت كل المطلوب مني رغم إن الأجواء كانت مُخيفة وغريبة، ريحة البخور، الصوت، اللبس، البنت الممسوسة اللي كان بيتعملها الزار نفسه، بس الغريب إنك مع طول الجلسة بتندمج وتحس إن روحك بتروح معاهم وإن فيه جزء جواك مستمتع باللي بيحصل..

فضلت معاها ٣ ساعات لحد ما خلصت الجلسة، والغريب إن كل بنت خدت ٥٠٠ جنيه كاملين، عايزة أقولك إني كنت بشتغل في المطعة ١٠ ساعات بـ ١٠٠ جنيه بس، ورجعت البيت وأنا مش مصدقة إن معايا المبلغ دا كله، يعتبر مرتب أسبوع لأني كنت بقعد من المطعم يوم أجازة، وفعلًا اتعوت رغم غرابة اللي كان بيحصل، اتعودت وحبيت كمان اللي بعمله، أو يمكن الفلوس بتخليك تحب أي حاجة..

ولما كلمتها مرة تانية على أمي قالتلي هتبقا كويسة قريب أوي ومش هتحتاج جلسات غسيل كمان، وبقيت متعلقة بالحجة مَلكة تعلق غير طبيعي، كنت شايفاها مصباح علاء الدين اللي بيحقق كل حاجة، فلوس، مكانة، علاج، بتحل المشاكل، ست قادرة تحول حياتك كلها للأحسن..

لحد ما روحنا زيارة، زيارة دمرت كل حاجة، كانت عروسة حصلتلها مشاكل يوم فرحها وكانت هتم*وت جوزها وعرفنا إنها ممسوسة وكان لازم لها جلسة زار، بس لأن اللي عليها على حسب كلام الحجة كان مارد فكان لازم الزار يتعمل في أوضة قديمة أوي جمب المقابــ . ـر، وفعلًا جهزنا الجلسة وبدأنا، في البداية كانت الأمور كلها طبيعية، مجرد صرخة بتخرج أو كلام غريب من البنت..

لحد ما بدأت أشوفها بتتحول لشكل تاني، لشكل راجل عنده لحية بيضا وعيون سودة، تخيل تشوف جسم بنت بوجه راجل عجوز، ولقتها بتشاور ناحيتي وبتصرخ وبتقول:

ـ هي دي هي دي..

مسافة ما قالت كدا جريت ناحيتي وض*ربتني ض*ربة وكأنها عربية نقل خلتني أطير من مكاني وأخبط في الحيطة بقوة غير طبيعية..

كل حاجة بعدها ضلمت، وجع وبعدها غيبوبة، غيبوبة شوفت فيها الراجل العجوز ده ماسك كرباج وبيض*ربني بيه بكل قوته وأنا عمالة استغيث بدون أي صوت، وصحيت منها في بيت الحجة اللي صدمتني لما قالت إنها استغنت عني ومش عاوزاني تاني، حاولت أعرف السبب بس مقالتش..